Ngiyombonga uNgikhona

Ngiyombonga uNgikhona ngaso sonke isikhathi, ngiyakumdumisa njalo ngizibonge ngoJehova.

Nin' abahluphekileyo, mdumiseni kanye nami, masitus' igama lakhe ngenxa yobubele bakhe.

Ngakhuleka kuJehova ekuhluphekeni kwami, nguye owangikhulula kulo lonk' uvalo lwami.

Abant' abahluphekile babheka kuye phezulu bayakhanya bejabula bengenawo amahloni.

Yebo, nas' isihlupheki sakhala, iNkosi yezwa yasikhulula ngempela kuzo zonk' izinhlupheko.

Ingelosi kaJehova im' eduze izungeza, abayesabayo Yona iyabakhulula bonke.

Nambithan' nizibonele ukuth' uJehova muhle; lowomunt' ubusisiwe ophephela kuye njalo.

Mesabeni uJehova nina enimazi Yena; abafuna uNgikhona abayikuswela lutho.

Wozani, ningilalele min' enginguthisha wenu, ngizonifundisa nonke ukumesab' uNgikhona.

Nguban' othand' ukuphila nokubona okumnandi? Lond' ulimi lwakho, wena, kokukhuluma okubi.

Deda kukh' okubi, funa, yebo, jonga ukuthula; uNgikhon' uyababona bonke abalungileyo.

Kepha Yena umelene nabo bonk' abenz' okubi; uzochith' ukukhunjulwa kwabo emhlabeni wonke.

UNgikhona useduze nabo abathobileyo uyabakhulula bonke ezinhluphekweni zabo.

Ziningi izinhlupheko zomuntu olungileyo, keph' iNkos' iyamkhulula kuzo zonk' izinhlupheko.

Onke amathambo akhe agcinwa nguy' uJehova, akakho omethembayo oyakuba nal' icala.