Ngiyakubonga, Ngikhona

Ngiyakubonga, Ngikhona, ngayo yonk' inhliziyo; ngoland' izimangaliso ozenza emhlabeni. Ngijabul' ngethabe kuwe, Ngikhona, o Phezukonke; ngiyakudumisa njalo igama lakho, Nkos'.

Izitha zami ziyawa zibuyele emuva zibhubh' ebusweni bakho ohlez' esihlalweni; ujezisil' abezizwe ubhubhisile ababi igama labo lesulwa ekuphakadeni.

Izitha zami zaphela imizi wayisimbul' nakh' ukukhunjulwa kwabo kuzokuphela konke. Ngokuba uyakubusa UNgikhona naphakade, uyathetha amacala ngobuqotho bakhe.

Inqaba yocindezelwe inguNgikhona-Nkosi, inqaba ngenkathi yonke yab' abasosizini. Nabalaz' igama lakho bazokukwethemba njalo ngokuba Wena, Ngikhona, awushiyi bodwa.

Hubani nimudumise ohlezi eSiyoni, nimemezel' ezizweni izenzo zakhe zonke. Uphindisela igazi akhumbule ukukhala kwabo abahluphekayo, akakukhohlwa nya.

Yiba-ke nomusa kimi ubon' izinhlupheko ezingivelela kubo abazondayo mina. Wena ongiphakamisa emasangweni okufa, ngilande ngolwakh' udumo eSiyoni lakho.

Bashonile abezizwe baphansi egebeni, unyawo lwabo lubhajwé esihibeni sabo. Omubi wonk' umcuphile wamahlulela, Ngikhona, ngawo wonke umsebenzi waz' izandla zakhe.

Ababi bayabuyela endaweni yokufa, ngokuba bakukhohliwe Ngikhona, Nkosi yami. Ompof' akakhohlakali nethemba labahlupheki aliyikunyamalala ekuphakadeni.

O, Ngikhona, mawuvuke, ukuba bangahluli, kepha bahlulelwe bonke phambi kobuso bakho. Ake bashaywe uvalo bakwesabe Wena, Nkosi, bazazi bonke ukuthi bangabantu kuphel'.